Cwm Clydach

Mae’r glaswelltir sborion glo yng Nghwm Clydach yn cynnal amrywiaeth o flodau gwyllt, ffyngau, cennau, ymlusgiaid a chreaduriaid di-asgwrn-cefn, yn ogystal â rhai rhywogaethau arbennig iawn gan gynnwys y wenynen sy’n cloddio am dresgl y moch a gwenynen werdd y gaeaf.

Gweirlöyn Llwyd • Grayling - © Iain H Leach - Butterfly Conservation

Cynefin

Mae gan Barc Gwledig Cwm Clydach fioamrywiaeth enfawr ac mae nifer o gynefinoedd i'w cael yno. Yr amlycaf yw'r glaswelltir sborion glo sy'n gyfoeth o flodau gwyllt, cennau a bryoffytau, ac yn gartref i ymlusgiaid ac anifeiliaid di-asgwrn-cefn.

Pryd i Ymweld

Ewch yno yn y gwanwyn i weld y coetir lliwgar yn llawn blodau gwyllt. Rhwng mis Mehefin a mis Awst mae modd gweld gwenyn prin sy'n bwydo ar dresgl y moch yn casglu paill o'r blodau melyn bach. Mae modd dod o hyd i gymunedau amrywiol o ffwng cap cwyr, cwrel a thafod y ddaear o ddiwedd mis Awst hyd at fis Tachwedd.

Bioamrywiaeth

Mae'r sborion glo gwlyb yn ffurfio amgylchiadau tebyg i lac twyni, gan ddarparu cynefin delfrydol i degeirian cors y de a dail coedwyrdd crwn prin. Bydd mwydod araf, gwiberod a madfallod yn gorwedd ar y tir poeth a bydd tylluanod gwynion yn hela am lygod, llygod pengrwn a llygon. Mae llawer o löynnod britheg berlog bach a britheg werdd i'w cael yma. Mae'r blodau gwyllt ar y sborion glo yn gymysg o grug, grug croesddail, llus, pysen y ceirw/bacwn ac wy, tegeirian gwenynen a llin y mynydd ynghyd â chlych y cerrig neu gen ceirw.